A Carreira do San Martiño de Ourense estrea percorrido e sobe os premios na súa 49ª edición
Ourense prepárase para unha nova edición da súa carreira popular máis veterana. A Carreira Pedestre Popular do San Martiño chega este ano á súa 49ª edición con varias novidades que foron presentadas esta mañá no salón de plenos do Concello: un percorrido renovado, un notable aumento nas contías dos premios económicos e unha maior implicación dos centros escolares da cidade.
A proba disputarase o domingo 8 de novembro e está organizada polo Consello Municipal de Deportes do Concello de Ourense, coa colaboración da Federación Galega de Atletismo, a Deputación de Ourense, a Xunta de Galicia e varias empresas patrocinadoras.
A proba absoluta, de 10 quilómetros de distancia, figura no Calendario da Real Federación Española de Atletismo 2026 coa categoría Internacional Nivel II, o que subliña a súa relevancia dentro do circuíto nacional.
Horarios e novo itinerario
A saída da proba principal darase ás 11.00 horas dende a Ponte do Milenio, mentres que a liña de meta se situará na rúa do Progreso, á altura da praza de Concepción Arenal. Os participantes organizaranse en distintos caixóns de saída, diferenciados por cores segundo a marca acreditada por cada corredor.
O novo percorrido discorrerá pola Ponte do Milenio, Xesús Pousa, avenida de Marín, Otero Pedrayo (pasando pola segunda glorieta da C536), Rodríguez Castelao, Cardeal Quevedo, Habana, Curros Enríquez, o Paseo, Lamas Carvajal, a Praza Maior, Bispo Carrascosa, Moratín, Colón, Padre Feijóo, Lugo, Ben-Cho-Shey, Galicia, Ramón Puga, Saínza, avenida de Zamora, O Cumial, Zamora e Progreso, ata chegar á praza de Concepción Arenal.
Ademais da proba absoluta, a xornada incluirá carreiras para as categorías máis novas. As categorías Sub18, Sub16 e Sub14, sobre unha distancia de 5 quilómetros, sairán de forma conxunta ás 12.10 horas. Seguiranas as categorías Sub12 e Sub10, cun percorrido de 1,1 quilómetros, ás 13.00 horas. Finalmente, a carreira absoluta tomará a saída ás 13.20 horas.
Inscricións e prazos
O prazo de inscrición xa está aberto a través da páxina web de Carreiras Galegas. Para a categoría absoluta, a cota será de 5 euros para quen se inscriba ata o 21 de outubro, prezo que subirá a 7 euros entre o 22 de outubro e o 1 de novembro. A participación nas categorías de menores e na modalidade inclusiva será de balde.
O prazo xeral de inscrición pecharase o 1 de novembro ás 23.59 horas, aínda que os centros escolares que desexen inscribir ao seu alumnado nas probas de categorías menores deberán completar os trámites antes do 19 de outubro.
Carácter solidario
A organización mantivo o compoñente solidario da proba. Tanto as persoas inscritas coma as que non vaian correr poderán realizar doazóns a favor dunha causa solidaria a través da propia pasarela de inscrición, mediante a opción coñecida como "Dorsal 0".
Premios económicos
Un dos principais cambios desta edición é o reforzo da dotación económica, que se repartirá entre as categorías masculina e feminina. Os tres primeiros clasificados da proba absoluta recibirán 4.000, 3.000 e 2.000 euros respectivamente, sempre que logren marcas inferiores a 29 minutos no caso dos homes e 32 minutos no das mulleres. Se non se baixa deses tempos, os premios quedarán fixados en 2.000, 1.500 e 1.000 euros.
Así mesmo, premiarase aos atletas locais: os tres mellores clasificados empadroados no concello de Ourense, en cada categoría, recibirán 600, 400 e 200 euros. Mantense tamén o Premio Especial CaixaBank, dotado con 300 euros, que recompensará ao primeiro home e á primeira muller en pasar polo control situado no quilómetro 5.
A organización fixou un incentivo de 1.000 euros para quen consiga bater o récord do percorrido, actualmente establecido en 28 minutos e 42 segundos para homes e 30 minutos e 23 segundos para mulleres.