Sociedade | Turismo

A sección da FEMP avanza no seu plan de turismo termal e en ferramentas de intelixencia turística, coa participación de máis de 70 entidades locais

A Deputación de Ourense deu a coñecer este xoves, no marco da feira Termatalia 2026, o plan de traballo da Rede de Vilas Termais da Federación Española de Municipios e Provincias (FEMP). A presentación correu a cargo do seu presidente, Luis Menor, quen tamén preside a institución provincial ourensá.

A proposta formula un cambio de enfoque respecto ao turismo termal tradicional: pasar da idea de acudir a un balneario á de instalarse temporalmente nunha "vila termal", entendida como un destino integral. Menor expuxo esta folla de ruta durante a súa participación no VII Congreso sobre Auga e Saúde, onde definiu a auga termal como un recurso de carácter estratéxico que combina saúde, sustentabilidade, desenvolvemento económico e cohesión do territorio.

Baixo o lema 'Vilas Termais: destinos para vivir mellor', a iniciativa pretende atraer o que os seus impulsores denominan o "novo viaxeiro termal", un tipo de visitante sen franxa de idade determinada, interesado no benestar e en hábitos de vida saudables, tendencia habitualmente identificada co termo "wellness".

Durante a súa intervención, o presidente da Rede de Vilas Termais repasou os traballos realizados dende 2023 en colaboración coa Secretaría de Estado de Turismo. Entre eles mencionou a elaboración dun Plan de Turismo Termal, a posta en marcha dun catálogo dixital que reúne a oferta de máis de 70 municipios adheridos, e o desenvolvemento dun sistema de intelixencia turística orientado a apoiar a toma de decisións a partir de datos. Tamén fixo referencia ao traballo en materia de formación, sustentabilidade e accesibilidade cognitiva dentro da rede.

Menor puxo o acento, ademais, na relevancia que ten o termalismo para os municipios rurais, tanto pola súa capacidade para frear a despoboación como pola xeración de emprego estable, subliñando tamén a súa relación co envellecemento activo e saudable.

Mesa redonda sobre o papel da auga no territorio

Tras a intervención inicial, o congreso incluíu unha mesa redonda baixo o título 'Vilas Termais FEMP: o mapa da auga que coida, conecta e dá futuro ao territorio', moderada polo director xerente de Expourense, Rogelio Martínez.

No coloquio tomaron parte o vicepresidente da Rede de Vilas Termais e alcalde de Cuntis, Manuel Campos; a alcaldesa de Archena, Patricia Fernández; e o alcalde de Mondariz-Balneario, César Gil. Os tres rexedores debateron sobre a importancia da auga mineiro-medicinal na identidade das súas localidades, as vantaxes de traballar de forma coordinada en rede e os retos pendentes para reforzar a posición do turismo termal español.