Universidade

O proxecto busca promover a xustiza social, a igualdade de oportunidades, o compromiso ético cos Obxectivos de Desenvolvemento Sostible da Axenda 2030 e a sostibilidade

A Facultade de Educación e Traballo Social do campus de Ourense vén de poñer en marcha o Programa Universitario de Liderado Social, denominado “Pulso”, unha iniciativa que nace co obxectivo de reforzar o compromiso do centro coa transformación social e coas dinámicas de participación activa da comunidade universitaria.

O programa orientará as súas actuacións a promover a xustiza social, a igualdade de oportunidades, o compromiso ético cos Obxectivos de Desenvolvemento Sostible da Axenda 2030 e a sostibilidade, segundo se destacou na súa presentación oficial. A proposta busca consolidar o papel da facultade como axente implicado na realidade social da súa contorna.

No acto de presentación participaron o vicerreitor do campus de Ourense, Francisco Javier Rodríguez, e a decana da facultade, Isabel Mociño, acompañada polos vicedecanos Deibe Fernández Simo e María José Vázquez. Durante a súa intervención, Mociño sinalou que o centro xa conta cunha ampla traxectoria de iniciativas con impacto social e que este novo programa funcionará como “unha caixa de resonancia” que permita darlles maior coherencia e proxección. Engadiu tamén que o compromiso social, o pensamento crítico e a formación integral resultan esenciais na preparación do estudantado.

Pola súa parte, o vicerreitor destacou o enfoque do programa, subliñando o seu carácter colaborativo e non impositivo, e a súa vocación de contribuír á construción dunha sociedade máis xusta, en liña cos principios da universidade.

Pulso estrutúrase a partir do plan estratéxico da propia facultade e implica a toda a comunidade universitaria, incluíndo estudantado, profesorado e persoal técnico e de administración. O programa pretende favorecer o desenvolvemento de competencias como o pensamento crítico, a responsabilidade social e o traballo en equipo, con impacto tanto na formación académica como na traxectoria persoal e profesional.

Entre os seus obxectivos principais figuran a colaboración con entidades da contorna vinculadas á atención á diversidade, a creación de espazos de accesibilidade universal e o impulso de accións formativas conxuntas con institucións e organizacións especializadas neste ámbito.

O programa articúlase en catro liñas de traballo. A primeira céntrase en accións de aprendizaxe-servizo orientadas a retos sociais e ambientais, integrando formación e intervención directa vinculada aos Obxectivos de Desenvolvemento Sostible, conectando “a aprendizaxe coas necesidades globais desde unha resposta local e contextualizada”.

A segunda liña recolle iniciativas de voluntariado con enfoque ético e responsable, baseadas na cooperación e no acompañamento, evitando prácticas estigmatizantes e promovendo a autonomía das persoas.

A terceira liña está centrada na solidariedade entendida desde unha perspectiva de dereitos, promovendo accións que eviten dinámicas asistencialistas e poñan o foco no recoñecemento das persoas como suxeitos activos.

Finalmente, a cuarta liña aborda a promoción da sostibilidade mediante actividades que fomenten a conciencia ambiental e social dentro da comunidade universitaria e no seu entorno, co obxectivo de avanzar cara a prácticas máis responsables.