Actos vandálicos destrúen a decoración de cabazas do Festival Xuncrea en Xunqueira de Espadanedo
O Concello de Xunqueira de Espadanedo fixo público un comunicado no que lamenta os danos causados de forma intencionada sobre a decoración instalada con motivo do Festival Xuncrea, celebrado recentemente na localidade ourensá.
Segundo detalla a institución, unha vez rematados os actos do fin de semana, constatouse que as cabazas que adornaban o claustro foran destrozadas deliberadamente. Desde o goberno local cualifican este tipo de comportamentos como incívicos e afastados do espírito de convivencia que, ao seu xuízo, caracterizou o festival.
O evento reuniu durante o fin de semana a boa parte da comunidade, que participou activamente na súa organización. O consistorio quixo agradecer publicamente o labor das asociacións locais e da comisión de festas, así como a colaboración dos veciños que cederon de forma voluntaria as súas propias cabazas para decorar o espazo.
En canto aos danos provocados, a administración local comprometeuse a repoñer e compensar proximamente a todas aquelas persoas cuxas cabazas resultaron danadas.
O comunicado conclúe cunha mensaxe de defensa do esforzo colectivo da veciñanza, subliñando que non se permitirá que accións illadas empañen o civismo amosado polo pobo durante a celebración.