Avante Ourense pide á Xunta un plan de reforzo para a atención á diversidade nos colexios
O colectivo Avante Ourense deu un novo paso dentro do seu proxecto ‘Ensinar importa’, co que vén presentando propostas en materia educativa ás distintas administracións. Nesta ocasión, dirixiu un escrito á Consellería de Educación, Ciencia, Universidades e Formación Profesional no que pide que se reforcen de xeito real os apoios destinados á diversidade do alumnado nos colexios galegos.
Para a organización, non abonda con que a inclusión quede recollida como un principio xeral se logo non se traduce en medios concretos. Defenden que cada centro debería contar co persoal, os materiais e a planificación necesarios para que ningún alumno quede sen o apoio que precisa, sen que iso dependa de como cada colexio consiga reorganizar o que xa ten.
O escrito recolle varias peticións concretas. Entre elas, que se revise como se asigna actualmente o profesorado especializado en Pedagoxía Terapéutica e en Audición e Linguaxe, e que se reforcen os equipos de orientación dos centros. Tamén piden máis persoal auxiliar e coidador, e que as baixas do persoal especializado se cubran con maior rapidez cando se producen.
Outra das propostas pasa por poñer límites de tempo aos trámites administrativos: que haxa prazos máximos tanto para avaliar as necesidades de cada alumno como para resolver a concesión de recursos extraordinarios. Avante Ourense reclama ademais que se cumpran de forma efectiva as horas de atención especializada xa recoñecidas, e que a Xunta publique cada ano datos que permitan saber con que recursos contan realmente os centros e que carencias persisten.
Como medida de fondo, a organización propón crear unha partida económica específica para a atención á diversidade e deseñar un plan galego nesta materia, que inclúa un diagnóstico actualizado da situación, a súa correspondente memoria económica, un calendario de posta en marcha e obxectivos que se poidan comprobar co tempo.
Xunto a este requirimento, Avante Ourense pediu formalmente reunirse coa Consellería para expoñerlle as medidas propostas, coñecer a súa postura ao respecto e falar sobre posibles compromisos concretos. O colectivo considera que a administración debería responder de forma clara a estas peticións e detallar que actuacións ten previstas para o alumnado con necesidades específicas de apoio educativo.
O seu portavoz, Francisco Diéguez, resumiu así a postura do colectivo: “Non abonda con recoñecer o dereito á inclusión educativa. Hai que garantir que ese dereito se cumpra en cada aula, en cada centro e para cada alumno e alumna”.
Esta proposta súmase ás que Avante Ourense foi presentando a través de ‘Ensinar importa’, unha liña de traballo propia coa que o colectivo busca achegar ideas concretas ao debate educativo e trasladalas a quen ten capacidade de decisión, co obxectivo de mellorar a escola pública.