Denuncian ante a Fiscalía a demolición da Casa de Baños de Ourense, integrada no BIC das Burgas
A Asociación para a Defensa do Patrimonio Cultural Galego (Apatrigal) levou á Fiscalía Provincial de Ourense a demolición da antiga Casa de Baños da cidade, un edificio incluído na contorna protexida do Ben de Interese Cultural (BIC) das Burgas. Segundo explicou o colectivo nun comunicado, trátase duns feitos de especial gravidade pola condición patrimonial e o valor histórico e arquitectónico do inmoble, que non pode tratarse como unha simple obra municipal máis, senón como unha posible afectación a un ben protexido que require unha explicación documentada.
O Concello de Ourense comezou os traballos de derrubamento a semana pasada, meses despois de que un incendio arrasase parte das instalacións o 15 de maio. A Consellería de Cultura, Lingua e Xuventude confirmou que a Dirección Xeral de Patrimonio Cultural, ao ter coñecemento destas actuacións, abriu un expediente de dilixencias informativas e pediu ao Concello que detivese a demolición ata aclarar a situación do edificio.
Apatrigal denuncia ademais un deterioro continuado do inmoble desde que pasou a mans municipais en 2016, baixo o mandato do popular Jesús Vázquez, deterioro que, segundo a asociación, se agravou notablemente tras o incendio de maio. O colectivo lembra que só doce días despois do lume, o 27 de maio, xa se reclamara formalmente á administración que se apuntalase o edificio e se adoptasen medidas urxentes para a súa restauración, non o seu derrubamento. Por iso, cuestionan que alternativas de consolidación se estudaron e quen tomou a decisión de demoler.
A entidade aclara que a súa denuncia non busca sinalar responsabilidades penais de antemán, senón que sexa o Ministerio Fiscal quen investigue o proceso e determine se os feitos poderían constituír delito. Segundo Apatrigal, o edificio formaba parte da historia termal de Ourense e da memoria colectiva da cidade, polo que o que está en xogo non son só uns muros, senón patrimonio e identidade.
Pola súa banda, o alcalde de Ourense, Gonzalo Pérez Jácome, defendeu a actuación a través dunha publicación en Instagram, alegando que existía risco para a estabilidade do edificio tras o incendio, o que motivou a contratación dunha demolición parcial. O rexedor explicou que a Casa de Baños está formada por varias construcións de distintas épocas, asentadas de xeito escalonado ata o río nunha zona de forte pendente e difícil acceso, condicións que marcaron os traballos de retirada de cascallo e elementos inestables, realizados con medios mecánicos desde o acceso principal e a parte traseira. Segundo Jácome, a intervención limitouse a retirar os elementos soltos, deteriorados ou perigosos para a seguridade do edificio e das construcións veciñas, conservando os muros estruturais e as vigas necesarias.