Derradeiros días para apuntarse ao torneo de xadrez que homenaxeará a Xosé Henrique Rodríguez Peña
O Ateneo de Ourense ultima os preparativos do torneo de xadrez que cada ano lembra a figura de Xosé Henrique Rodríguez Peña. A proba, denominada 'Aberto de Xadrez Activo Memorial Xosé Henrique Rodríguez Peña', terá lugar o sábado 10 de outubro no Pavillón do Espazo Xove de Ourense, na rúa Celso Emilio Ferreiro número 17, baixo. O inicio das partidas está previsto para as 16.30 horas.
A proba está organizada polo Ateneo de Ourense, coa colaboración do Espazo Xove de Ourense e o Club Xadrez As Burgas, e está homologada para o ELO Fide de partidas rápidas, polo que se disputará conforme ás normas específicas desta modalidade recollidas nas Leis do Xadrez. Para participar será necesario dispor da licenza en vigor da presente tempada.
O torneo constará de sete roldas cun ritmo de xogo de 10 minutos máis 3 segundos de incremento por xogada e xogador. Os emparellamentos realizaranse por sistema suízo, empregando o programa informático Vega.
Quen desexe sumarse a esta edición debe ter en conta que a inscrición, totalmente gratuíta, pode formalizarse ata o vindeiro xoves 8 de outubro ás 24.00 horas. Para participar, abonda con enviar un correo electrónico a xadrezateneo@gmail.com ou xadrezasburgas@gmail.com indicando nome, apelidos, club ao que se pertence e ID de xogador.