O BNG de Celanova reclama revisar o semáforo foto-vermello da estrada de Ourense e suspender as sancións mentres se estuda a súa sinalización
O grupo municipal do BNG de Celanova rexistrou unha moción na que pide ao Concello que revise tanto o funcionamento coma a sinalización do sistema de control coñecido como 'foto-vermello', instalado no semáforo que regula o cruzamento entre a estrada de Ourense e a rúa da Coutada.
Dende a formación nacionalista aseguran compartir o obxectivo de reforzar a seguridade viaria e protexer peóns e vehículos, pero consideran que un dispositivo deste tipo debería ter ante todo un carácter preventivo, acompañado dunha sinalización o suficientemente visible como para que os condutores poidan anticiparse e adaptar a súa condución con marxe abondo.
A portavoz municipal, Ernesta Seoane, explica que nas últimas semanas o BNG recibiu queixas de veciños e usuarios da vía relacionadas coa sinalización actual. Segundo o grupo, o aviso que advirte da presenza do sistema é pouco visible e está colocado demasiado preto do punto de control, o que ao seu xuízo limita o seu efecto preventivo e pode xerar freadas ou reaccións bruscas por parte de quen circula pola zona.
"Non cuestionamos que se controle o cumprimento dos semáforos. O que reclamamos é que o obxectivo principal sexa conseguir unha circulación máis segura, non acumular sancións. Se queremos que os vehículos reduzan a velocidade e respecten o semáforo, o primeiro é advertir con claridade e con suficiente antelación", sinala Seoane.
Piden suspender temporalmente as sancións mentres se revisa o sistema
Entre as peticións recollidas na moción figura a suspensión temporal da emisión de novas multas e da tramitación dos expedientes sancionadores derivados deste dispositivo, mentres non se apliquen as melloras de sinalización que reclama o BNG.
O grupo municipal solicita ademais unha revisión técnica completa do semáforo, que inclúa os tempos de transición entre fases, así como a comprobación de que o sistema foto-vermello cumpre con todos os requisitos técnicos esixibles.
Para os nacionalistas, esta revisión serviría para disipar as dúbidas existentes entre a veciñanza e para garantir que as sancións se impoñen cun sistema correctamente configurado e cunhas condicións de funcionamento coñecidas e transparentes.
Máis medidas preventivas na estrada de Ourense
A proposta do BNG vai máis alá do propio sistema sancionador. A moción propón instalar novos elementos de aviso na zona e estudar a posibilidade de incorporar pasos de peóns elevados, xunto con outras medidas de redución de velocidade que permitan moderar o tráfico antes de que os vehículos cheguen á parte máis urbana da estrada.
"O foto-vermello debería ser a última ferramenta, pensada para comportamentos puntuais que realmente poñan en risco a seguridade. Antes temos que conseguir que a propia configuración da vía favoreza velocidades máis baixas e unha convivencia segura entre vehículos e peóns", defende Seoane.
O BNG pide transparencia sobre a empresa que xestiona o sistema
Outro dos puntos centrais da iniciativa ten que ver co funcionamento interno do dispositivo. O BNG solicita ter acceso ao contrato subscrito coa empresa privada responsable da captación de imaxes e a videogravación, así como á documentación sobre o tratamento dos datos vinculados ás matrículas, as características técnicas do equipo, a súa homologación e as autorizacións correspondentes.
"Se o Concello utiliza un sistema que pode acabar derivando nunha sanción económica para a veciñanza, debe existir a máxima transparencia sobre como funciona, quen o xestiona e que garantías ofrece", sostén a portavoz nacionalista.
"Seguridade viaria si, pero con información e garantías"
O BNG insiste en que o debate non debería limitarse a estar a favor ou en contra das multas, senón a definir que modelo de seguridade viaria se quere para Celanova.
"Queremos que se respecte o semáforo e que ninguén poña en perigo a un peón ou a outro vehículo. Precisamente por iso defendemos unha sinalización clara, medidas que reduzan a velocidade de forma previa e un sistema transparente e tecnicamente garantido. A prevención ten que ir por diante da sanción", conclúe Ernesta Seoane.
O grupo municipal levará esta moción ao vindeiro Pleno, onde reclamará que o Concello revise o sistema actual e adopte medidas que permitan compaxinar o control das infraccións cunha mellor información aos condutores e cunha mellora real da seguridade viaria nese punto.