O Irixo abre tres liñas de axudas para asociacións veciñais, culturais e clubs deportivos
O Concello do Irixo puxo en marcha tres convocatorias de subvencións dirixidas a entidades sen ánimo de lucro do municipio, co obxectivo de respaldar o tecido asociativo local nas súas distintas vertentes: veciñal, cultural e deportiva.
En total, o consistorio destina 8.000 euros a estas axudas, repartidos en tres partidas diferentes segundo o tipo de entidade beneficiaria.
A primeira das convocatorias está dirixida ás asociacións veciñais con sede e actividade no municipio, co fin de impulsar a participación cidadá, a convivencia e a dinamización da vida local. Para esta liña resérvanse 3.000 euros, que se repartirán entre todas as solicitudes que cumpran os requisitos fixados nas bases.
A segunda convocatoria ten como destinatarios aos clubs e entidades deportivas do municipio, tamén sen ánimo de lucro, co propósito de sosteren a súa actividade habitual ou a súa participación en competicións oficiais. Neste caso, o importe total ascende igualmente a 3.000 euros, que se distribuirán de forma proporcional entre as entidades que reúnan as condicións establecidas.
Por último, a terceira liña de axudas está pensada para as asociacións culturais, co obxectivo de respaldar a organización de actividades e proxectos deste ámbito, así como de fomentar a participación veciñal. Esta partida conta cunha dotación de 2.000 euros, que tamén se repartirá entre as solicitudes admitidas.
Nos tres casos, a contía que reciba cada entidade dependerá do número total de solicitudes presentadas, xa que o importe se divide entre todas aquelas que cumpran os requisitos.
As entidades interesadas dispoñen dun prazo de 15 días hábiles para presentar a súa solicitude, a contar desde o día seguinte á publicación de cada convocatoria no taboleiro de anuncios e na sede electrónica municipal. Os avisos comunicáronse no Boletín Oficial da Provincia (BOP) correspondente ao 21 de outubro.