Ourense gardará un minuto de silencio esta tarde polas vítimas do accidente de tren de Toledo
Varios concellos da provincia de Ourense decidiron sumarse aos actos de homenaxe convocados en toda España tras o grave accidente de tren rexistrado durante a xornada na provincia de Toledo.
Na capital ourensá, o Concello organizou un minuto de silencio ás 20.00 horas, na porta do edificio consistorial. Con esta iniciativa, o goberno local súmase ao chamamento realizado pola Federación Española de Municipios e Provincias (FEMP), que pediu aos concellos de todo o país gardar este xesto como mostra de respecto cara ás vítimas.
No Carballiño, o goberno municipal tamén convocou un minuto de silencio, neste caso ás 20.00 horas na Praza Maior. Neste caso, o executivo local súmase á convocatoria impulsada conxuntamente pola FEMP e a Federación Galega de Municipios e Provincias (Fegamp).
O accidente, ocorrido esta mesma mañá na liña de alta velocidade entre Madrid e Andalucía, ao seu paso pola provincia de Toledo, deixou un elevado número de persoas falecidas e feridas, segundo as últimas informacións difundidas polos servizos de emerxencia. O suceso xerou unha onda de solidariedade en numerosos concellos do país, que se foron sumando ao longo do día a este tipo de actos de homenaxe.