Actualidade

A formación reclama o expediente completo da adxudicación, valorada en máis de 750.000 euros, despois de coñecerse unha presunta omisión na súa fiscalización previa

Avante Ourense anunciou que solicitará toda a documentación relacionada co contrato para o control de accesos á Zona de Baixas Emisións (ZBE) da cidade, unha adxudicación que supera os 750.000 euros de fondos públicos. A formación decidiu ademais trasladar o asunto a dous organismos de control: a Oficina Independente de Regulación e Supervisión da Contratación (OIReScon), dependente do Ministerio de Facenda, e o Consello de Contas de Galicia.

A iniciativa chega despois de que trascendese, segundo documentación municipal recollida por distintos medios, que se tería producido unha omisión na fiscalización previa da adxudicación deste contrato, malia o cal o Concello mantería a súa intención de seguir adiante co proceso.

Desde Avante Ourense sosteñen que unha partida desta contía, superior aos 750.000 euros, esixe o máximo nivel de control e transparencia por parte da administración local. Por ese motivo, a formación pedirá acceso ao expediente completo do contrato, ao informe da Intervención municipal no que se explicaría a citada omisión de fiscalización, e a todos os informes xurídicos, técnicos e económicos que sirvan de base para decidir continuar coa tramitación.

Paralelamente, Avante Ourense porá estes feitos en coñecemento da OIReScon e do Consello de Contas de Galicia, co obxectivo de que ambos os dous organismos, dentro das súas respectivas competencias, poidan coñecer e valorar o sucedido.

O coordinador da formación, Francisco Diéguez, mostrouse contundente á hora de defender esta decisión. Diéguez afirmou que o Concello "non é o cortello persoal" do alcalde e insistiu en que unha cantidade tan elevada de diñeiro público "non se pode xestionar sen todas as garantías". O dirixente avisou de que, ante calquera indicio de delito, acudirán á Fiscalía, e subliñou que actuarán "con documentos na man e ata onde sexa necesario", deixando claro que a súa intención non é lanzar ameazas nin buscar titulares.

Nesa mesma liña, desde a formación política expoñen que, se o proceso se desenvolveu conforme á legalidade, o lóxico sería que se entregasen todos os informes solicitados e se ofrecesen explicacións con total transparencia. En caso contrario, advirten de que esixirán que se depuren todas as responsabilidades que poidan corresponder, con independencia de a quen afecten.