Avante Ourense propón destinar 200.000 euros anuais a mobilizar vivenda baleira e ampliar o parque público
Avante Ourense presentou unha contraproposta á iniciativa impulsada polo PSOE no Concello de Ourense, que propón reservar 200.000 euros para poñer en marcha en 2027 unha primeira edición do programa 'Ourense en Inglés', destinado a un mínimo de 50 estudantes de 3º da ESO.
A formación recoñece que fomentar a aprendizaxe do inglés e ampliar as oportunidades educativas para a mocidade son obxectivos relevantes, pero considera que esa mesma capacidade de investimento municipal debería orientarse cara a unha necesidade que cualifica de estrutural: o acceso á vivenda.
Con ese enfoque, Avante Ourense propón crear un Programa Municipal de Vivenda Pública e Alugueiro Social, dotado inicialmente con 200.000 euros anuais. Os fondos destinaríanse a adquirir e rehabilitar inmobles e, sobre todo, a mobilizar vivendas que na actualidade permanecen baleiras para incorporalas ao alugueiro a prezos accesibles.
O voceiro da formación, Francisco Diéguez, defendeu a proposta sinalando que "unha experiencia educativa no estranxeiro pode durar unhas semanas", mentres que "unha política de vivenda pode permitir que unha persoa ou unha familia poida seguir vivindo en Ourense durante anos". Diéguez matizou que non se trata de restar importancia a ningunha das dúas cuestións, senón de expor "que o Concello ten que decidir tamén que necesidades estruturais quere afrontar cos seus recursos".
Na mesma liña, o voceiro insistiu en que non se cuestiona a importancia de aprender inglés, senón que se busca abrir un debate sobre que pode facer o Concello con 200.000 euros para facer fronte a un problema que, segundo explicou, "está expulsando a persoas e familias" da cidade: o acceso á vivenda.
O plan, en detalle
A proposta de Avante Ourense inclúe un sistema público de garantías dirixido aos propietarios de vivendas baleiras. Segundo este mecanismo, o Concello asumiría, nas condicións que fixe o programa e de acordo coa normativa vixente, os riscos económicos derivados do alugueiro, a cambio de que a vivenda se destine durante un período mínimo ao alugueiro accesible e baixo criterios sociais.
A formación propón, ademais, que aquelas vivendas residenciais que permanezan baleiras de forma permanente e sen causa xustificada, e que non se acollan aos mecanismos públicos de mobilización, soporten o recargo máximo do Imposto de Bens Inmobles (IBI) que permite a lexislación, sempre respectando os requisitos e procedementos legalmente establecidos.
Como meta inicial, o programa fixaría o obxectivo de mobilizar ou incorporar polo menos 100 vivendas durante os seus primeiros catro anos de funcionamento, combinando a creación de parque público coa mobilización de vivenda privada a través de garantías públicas. A proposta contempla tamén a publicación dun balance anual cos resultados obtidos.