Avante Ourense propón unha tarxeta xove única e o pagamento con tarxeta bancaria nos autobuses urbanos
Avante Ourense rexistrou no Concello de Ourense un conxunto de iniciativas orientadas a modernizar o servizo de autobuses urbanos da cidade. As propostas artéllanse en dous eixos principais: a unificación das tarxetas destinadas á mocidade nun único título, denominado Milenio Xove, e a incorporación de tecnoloxía que permita aboar o billete directamente con tarxeta bancaria ou dispositivos móbiles.
En relación coa primeira medida, a formación propón fusionar as distintas modalidades de tarxeta xuvenil existentes na actualidade nunha soa, que garantiría a gratuidade do servizo para os usuarios de entre 0 e 18 anos. Ademais, este título podería renovarse anualmente ata os 27 anos, sempre que a persoa interesada acredite que está a cursar algún tipo de formación.
O coordinador de Avante Ourense, Francisco Diéguez, considerou que o funcionamento actual do sistema xera unha situación incoherente: os menores viaxan de balde ata os 14 anos, pasan a pagar o billete aos 15, e recuperan a gratuidade entre os 16 e os 18 anos. Segundo explicou, o obxectivo da proposta é eliminar esta descontinuidade e ofrecer un modelo máis sinxelo e comprensible para as familias.
A segunda proposta céntrase na instalación de sistemas de pagamento contactless nos propios autobuses, que permitirían aos usuarios aboar o traxecto con tarxeta bancaria, teléfono móbil ou reloxo intelixente, sen necesidade de contar previamente coa tarxeta Milenio nin de levar diñeiro en efectivo.
Dende a formación defenden que impulsar o uso do transporte público pasa tamén por facelo máis accesible e adaptado ás rutinas diarias da cidadanía, especialmente no caso da mocidade e daquelas persoas que utilizan o autobús de forma puntual ou ocasional.
Por todo isto, Avante Ourense solicitou ao Concello que analice a viabilidade técnica, económica e xurídica de ambas as medidas, co fin de avanzar cara á súa posta en marcha. Diéguez subliñou que modernizar o transporte público non implica unicamente redeseñar o mapa de liñas, senón tamén facilitar que a cidadanía poida facer un uso real e cómodo do servizo, a través de medidas que, segundo defendeu, son sinxelas de aplicar e poderían ter un impacto positivo no día a día dun elevado número de persoas.