Avante Ourense traslada á Fiscalía Europea as súas dúbidas sobre o contrato da Zona de Baixas Emisións
O partido Avante Ourense presentou un escrito ante a Fiscalía Europea no que pide que se investiguen posibles irregularidades relacionadas co contrato para a implantación do sistema de control de tráfico da Zona de Baixas Emisións (ZBE) de Ourense.
Segundo explica a formación, a decisión responde ao que consideran unha falta de información pública e de respostas suficientes por parte do Concello ante as preguntas formuladas arredor deste contrato. Ao non poder acceder, segundo sinalan, á documentación necesaria para esclarecer o sucedido, o partido optou por trasladar o asunto ao organismo europeo competente para que sexa este quen examine o procedemento.
No seu escrito, Avante Ourense solicita que se comprobe se existen e que contido teñen os informes de fiscalización do contrato, se se cumpriron os procedementos habituais de control do gasto público e se os fondos europeos NextGenerationEU asociados ao proxecto se aplicaron correctamente. A formación pide ademais que se reúna toda a documentación administrativa, económica e técnica do expediente, co obxectivo de determinar se hai indicios de irregularidades que poidan afectar aos intereses financeiros da Unión Europea.
O escrito propón así mesmo que se revise a actuación dos responsables públicos que participaron no procedemento, entre eles o alcalde, así como a da empresa adxudicataria do contrato, SICE, para esclarecer se tivo algún tipo de implicación nos feitos obxecto da solicitude.
Desde Avante Ourense insisten en que esta comunicación á Fiscalía Europea non dá por feito que se cometese ningún delito, senón que busca que os organismos competentes conten coa documentación necesaria para aclarar o ocorrido e, se é o caso, determinar responsabilidades.
O portavoz da formación, Francisco Diéguez, defendeu a decisión sinalando que "cando o Concello non ofrece información suficiente nin facilita a transparencia que require a xestión dos recursos públicos, temos a obriga de acudir ás instancias competentes", e lembrou que se trata dun contrato ligado a fondos europeos sobre o que, ao seu xuízo, "a cidadanía ten dereito a saber como se emprega o seu diñeiro e que controis se realizan".
Avante Ourense reclama, en definitiva, maior transparencia e unha fiscalización efectiva sobre a tramitación deste contrato, e defende que a xestión dos fondos públicos debe contar con todas as garantías, de xeito que calquera irregularidade que puidese existir quede esclarecida conforme á legalidade vixente.