O Concello de Ourense propón reconverter a antiga cadea e a Casa de Baños nun parador de turismo cunha vintena de habitacións
O Concello de Ourense formulou unha proposta para darlle un novo uso á antiga prisión da rúa do Progreso e á Casa de Baños, coa idea de que o conxunto formado por ambos os dous edificios pase a ser un Parador Nacional de Turismo. A iniciativa trasladouse á Administración estatal a través da Sociedade Mercantil Estatal Paradores de Turismo de España.
O proxecto foi presentado na mañá deste luns polo alcalde de Ourense, Gonzalo Pérez Jácome, que defende esta vía como unha maneira de recuperar estes espazos e sacar proveito do seu potencial turístico e termal.
Un parador de pequeno formato
Segundo explicou o rexedor, tratariase dun parador de tipo boutique, con tamaño reducido e adaptado ás características dos inmobles. Contaría con vinte habitacións e estaría estreitamente vinculado ao termalismo, un dos grandes recursos da cidade.
Pérez Jácome lembrou que en España xa existen paradores de dimensións contidas instalados en edificios singulares que foron rehabilitados para lles dar unha nova vida turística. Neste caso, o principal atractivo sería, nas súas palabras, "a localización excepcional: xunto ás termas, nun enclave urbano privilexiado e coa posibilidade de crear un establecemento con identidade propia, ligado á súa historia e, ao mesmo tempo, ao carácter termal de Ourense".
O alcalde subliñou que Ourense "non pide unha subvención: ofrece ao Estado un proxecto", e resumiuno en catro ideas: un edificio con historia, unha contorna única, unha rede turística nacional e unha nova vida para todo o complexo.
Cesión de uso durante 75 anos
A fórmula plantexada mantén a titularidade municipal dos terreos e dos edificios. O Concello cedería o uso do complexo por un período de 75 anos a Paradores de Turismo de España, que asumiría tanto a rehabilitación como a xestión do establecemento durante ese tempo.
Deste modo, Ourense conservaría a propiedade deste patrimonio, mentres que o Estado, a través de Paradores, podería acometer a súa transformación e a súa explotación turística.
Acceso ás canles de Paradores
O alcalde considera que integrar Ourense na Rede de Paradores achegaría un valor engadido á recuperación desta zona da cidade, ao permitir o acceso ás súas canles de promoción, comercialización e reservas. Engadiu que Paradores conta cunha clientela que busca precisamente este tipo de aloxamentos singulares.
Por iso, sostivo que a cidade non dependería unicamente de captar visitantes pola súa conta, xa que entraría nun circuíto turístico de ámbito nacional que canalizaría cara a Ourense unha demanda que xa utiliza esta rede para organizar as súas viaxes.