O Concello de Ourense recoñece os mellores debuxos escolares inspirados na carreira de San Martiño
O Auditorio Municipal de Ourense acolleu esta mañá o acto de entrega de premios da primeira edición do concurso de debuxo "Todos á San Martiño-Veolia", unha iniciativa que distinguiu as vinte mellores creacións realizadas por alumnado de 5º e 6º de Primaria e de 1º e 2º de Secundaria da cidade, todas elas inspiradas na popular carreira San Martiño.
Ao acto asistiron o alcalde, Gonzalo Pérez Jácome; o concelleiro de Deportes, Aníbal Pereira; a concelleira de Educación, Tamara Silva; a xerente de Veolia en Ourense, Paula Díaz; e representantes dos distintos grupos políticos municipais.
Durante a súa intervención, o rexedor puxo en valor a contribución dos máis pequenos ao éxito desta cita deportiva, subliñando que a categoría infantil é a que marca a diferenza fronte a outras probas similares que se celebran en Galicia. Nas súas palabras, destacou que son precisamente os escolares quen converten a San Martiño na carreira "máis grande" da comunidade.
Unha tradición que se transmite ás novas xeracións
A carreira San Martiño forma parte do patrimonio inmaterial da cidade de Ourense, e o Consistorio traballa para manter viva esta herdanza a través de iniciativas como este concurso, pensadas para reforzar o vínculo entre o alumnado e a proba deportiva, na que xa participan milleiros de nenos e nenas cada ano. O certame permitiu que os propios estudantes plasmaran a través do debuxo o que esta cita representa para eles.
Os vinte deseños gañadores non quedarán unicamente expostos: terán un papel destacado na vindeira edición da carreira, xa que se empregarán para sinalizar os puntos quilométricos cada 500 metros ao longo de todo o percorrido. Como recoñecemento ao seu traballo, os autores e autoras recibiron equipamento deportivo conmemorativo, mentres que os seus centros educativos foron agasallados cun vale canxeable por material deportivo.
Un xurado especializado valorou 220 propostas
A selección das obras premiadas foi responsabilidade dun xurado reunido o pasado 15 de outubro, composto pola artista plástica Elena Guevara; o fundador da carreira, Julio Fernández Pérez; a directora de espazos expositivos Eva Torres; e a coordinadora de programas educativos Sara Dacal. Entre os 220 traballos presentados por nove centros escolares da cidade, o xurado quixo resaltar o elevado nivel creativo e a calidade xeral das propostas antes de outorgar os galardóns.
Deportistas de primeiro nivel compartiron a súa experiencia cos escolares
A gala incluíu ademais unha charla motivacional dirixida a transmitir aos asistentes os valores do deporte e a relación histórica desta proba coa cidade. Para iso, contou coa presenza de varias figuras destacadas do atletismo:
Álex Fernández, atleta ourensán con seis vitorias na San Martiño, considerado un referente e toda unha lenda desta carreira.
Esther Navarrete, atleta galega que participou nos Xogos Olímpicos de París 2024 na proba de maratón, campioa de Europa por equipos en media maratón en 2025 e tres veces vencedora da San Martiño, proba que, segundo recoñeceu, sente como a "súa segunda casa".
Alice Finot, unha das grandes referentes do atletismo europeo, campioa continental en 3.000 metros obstáculos en Roma, subcampioa de Europa en 3.000 lisos en pista cuberta, posuidora do récord europeo e cuarta clasificada nos Xogos Olímpicos de París 2024.
Julio Fernández Pérez, fundador e impulsor histórico da proba, quen compartiu cos escolares as orixes e as motivacións que deron lugar á creación desta carreira, convertida en todo un emblema deportivo e educativo da cidade.
Inscricións abertas para a vindeira edición
A carreira popular alcanzará a súa 49ª edición o domingo 9 de novembro, con varias novidades respecto a anos anteriores, entre elas cambios no percorrido, un notable incremento nas dotacións económicas dos premios e un maior peso da participación dos centros educativos.
O prazo de inscrición permanece aberto a través da páxina web de Carreiras Galegas.