O PP de Ourense pide ao goberno local que aclare que pasou na Casa de Baños e presente un proxecto para protexela
O Grupo Municipal do Partido Popular no Concello de Ourense pediu ao goberno local que explique con detalle que actuacións se levaron a cabo na Casa de Baños de Outeiro e que presente, canto antes, un proxecto técnico que permita protexer o que queda do inmoble e iniciar a súa recuperación.
A portavoz municipal do PP, Ana Méndez Gil, defendeu que os veciños da cidade teñen dereito a saber que ocorreu cun edificio que, segundo subliñou, forma parte da historia termal de Ourense e pertence a toda a cidadanía.
A petición do PP apóiase nun documento da Dirección Xeral de Patrimonio Cultural rexistrado no Concello o pasado 15 de setembro, no que se denega a autorización para realizar novas demolicións, desmontaxes, apeos ou labores de consolidación no edificio mentres non exista un proxecto redactado por un profesional competente.
Ese escrito de Patrimonio responde, á súa vez, ás explicacións que o propio Concello remitira un día antes, o 2 de setembro. Nelas, o goberno municipal sostiña que as obras quedaran paralizadas o 12 de agosto, cuestionaba a actuación da Xunta neste asunto e defendía que non era necesario un proxecto para apuntalar a fachada principal do edificio.
Patrimonio rexeita estes argumentos e lembra que o Concello, como propietario dun inmoble protexido, estaba obrigado a comunicar calquera dano, ameaza ou intervención sobre el, así como a adoptar as medidas necesarias para garantir a súa conservación.
Segundo o documento, desde que se produciu o incendio que afectou ao edificio o pasado 15 de maio non se recibira en Patrimonio ningunha comunicación nin solicitude por parte do Concello. De feito, o organismo autonómico non tivo constancia ata o 17 de agosto dunha providencia asinada o 4 de xuño para adoptar medidas urxentes na Casa de Baños.
"O incendio produciuse o 15 de maio. Houbo case tres meses para comunicar os danos, solicitar autorización e preparar unha intervención con garantías. Agora o importante é aclarar que se fixo durante ese tempo, protexer os elementos que se conservan e presentar un proxecto serio de recuperación", sinalou a voceira popular.
O informe de Patrimonio recolle tamén que se contrataron e executaron actuacións no inmoble sen ningún tipo de cautela nin autorización previa da Consellería, malia tratarse dun edificio con protección integral e estrutural, incluído ademais na delimitación do Ben de Interese Cultural (BIC) que ampara o conxunto das fontes termais das Burgas.
O documento pon en dúbida, igualmente, a urxencia esgrimida polo Concello para xustificar as obras realizadas. Patrimonio considera que, desde o 15 de maio, houbo tempo suficiente para realizar as consultas oportunas, redactar o proxecto correspondente e executar as medidas de conservación necesarias nun ben cultural destas características.
Así mesmo, o organismo autonómico insiste en que non se pode intervir no edificio sen un proxecto técnico. Calquera actuación que vaia máis alá dos traballos estritamente indispensables para evitar un risco inmediato debe estar dirixida por un profesional competente, e mesmo as medidas de urxencia deben xustificarse debidamente e limitarse aos traballos provisionais imprescindibles.
"Protexer a seguridade e respectar o patrimonio son dúas obrigas compatibles. Ourense non ten que escoller entre unha cousa e outra. O que precisa é planificación, dirección técnica e unha actuación coordinada que permita conservar e recuperar o edificio", afirmou Méndez Gil.
Patrimonio si autoriza de forma inmediata o peche perimetral da zona, sempre que non afecte ao propio inmoble, pero esixe que calquera outra intervención vaia precedida dun proxecto técnico. Ese proxecto deberá reflectir o estado do edificio antes e despois do incendio, identificar as demolicións e desmontaxes xa realizadas, e incluír planos e fotografías suficientes para preparar unha futura rehabilitación. Tamén deberá acreditar en que estado se atopan e onde se custodian os elementos históricos, culturais e termais que se retiraran do inmoble.
Con este contexto, o Partido Popular presentou unha solicitude por rexistro na que pide ao goberno municipal que informe de que elementos foron demolidos ou desmontados, onde se conservan as pezas retiradas, que medidas se adoptaron para protexelas e cando estará listo o proxecto que esixe Patrimonio.
"Esta documentación está no Concello desde o 15 de setembro. É o momento de informar con transparencia, protexer o que queda e poñer en marcha unha solución. Ourense non pode resignarse a perder outra parte da súa historia", concluíu Méndez Gil.